本文重點
今個月多喜慶節日，仲唔知係咪履新嘅好日子，好似港交所（00388）候任行政總裁李小加，就會喺月中（即係十六日）履新。不過，大家唔好諗住好似金管局總裁陳德霖咁，可以喺佢返工首日問佢任內有乜抱負，據聞，李小加正式返工嘅首日不在香港，佢已出門公幹。太子聽聞，李小加月中會同現任行政總裁周文耀到美國進行拜訪。大家如果想問小加返工嘅感受同目標，就要等佢返來啦。
與周文耀齊外訪
周文耀早前話會喺未來呢三個月嘅過渡期內，同李小加一齊外訪。因此李小加未來肯定會有排飛。
講開外訪，港交所十一月九日同十日，會首次同時喺南韓同日本舉行研討會，推介香港。今次港交所係夥拍貿發局等，向日韓公司，推介如何利用香港途徑進軍內地同籌集資金。