恒指係就係重上21,000點，但又唔見得志強班炒鬼老友拍手叫好，事關二三線股走晒樣，上周曾熱炒的輝影（00630）更單日急挫近四成。志強所持的國美（00493）升番1%，未有耐見家鄉。不過，唔少大行都睇好其前景，志強一於坐定定。

廣南（01203）已公布中期純利，馬口鐵業務溢利平穩，亦繼續派息，尋日股價急升逾一成，唔排除在低息環境中，有投資者出動搶息。由於馬口鐵多用作飲料罐、食品罐、瓶蓋等與食品相關的容器，既為副食品製品、罐頭及飲料的必需品，有一定市場需求。

全年業績料平穩

經過去年底市場去庫存化逐步完成，廣南的馬口鐵銷售量，亦已回復至正常水平，相信集團全年業績表現平穩。

近日大市走勢欠明朗，唔少投資者未敢貿然入市，而廣南派息穩定，現價市帳率不足一倍，市盈率十倍左右唔算高，在走勢飄忽的市況中，自有其獨特吸引力。