3G收費呈兩極化

近排聯通（00762）新聞唔少，除斥資百億回購SK Telecom手上的股份外，趁「十．一」黃金周，3G網絡將正式投入商業營運前，尋日一份麥格理報告，提到聯通3G服務月費計劃，內容令筆者都嚇咗一跳，因為唔計最低入門96元人民幣，最高用量組合居然去到886元人民幣，等於1,006港元，對見慣網絡商打生打死，用開一百幾十蚊一個月電話費的香港人來說，真係意想不到。

睇番聯通中期業績，每月每戶平均消費（ARPU）為60元人民幣，換句話說，3G比標準收費高60至1,376%，內地係咪咁多尊貴用戶？電訊商又係咪咁好賺？相信要時間證明，但估計網絡商對高價3G手機補貼會相當大手筆。由收費計劃，史提芬第一個感覺係內地貧富懸殊的確嚴重，樓市係咁，連手提電話市場都一樣。

憧憬內地三大3G陣營要鬥快建網提供巨額合約，內地電訊設備股近一個月累積升幅唔細，留意到規模最細嘅中國無線（02369），九月中旬才發力，一口氣由0.57元升到0.97元，半個月升幅達七成。

業績轉盈爆發力強

中國無線中期業績虧轉盈，由去年蝕4,925萬元變到今年回復3,240萬元盈利，其實並非經營改善或者海嘯後反彈，反而是時勢造英雄，關鍵在於中電信（00728）接收CDMA網絡下，呆滯的CDMA手機定單回升，佔收入比例由去年的1.8%大升至44.2%。另外，中國無線是最先提供TD-SCDMA與GSM雙頻網絡的供應商之一，中移（00941）的TD網啟用，採購比重增加，也是令業績一百八十度回升的主因。

去年業績太差，唔少大行終止為中國無線撰寫報告，但可以肯定的是，其業績最壞時刻應該過咗。以市值20億元計，中國無線論晒士遠細過同業中興（00763）或者京信（02342），但業績虧轉盈的爆炸力較強，相信全年唔難交到1億至1.3億元利潤，○九年估值會比上述兩間公司都低，雖有點投機意味，但看來仲係值得一試。