中國南車（01766）復牌，宣布旗下附屬獲總值724億元人民幣的動車組合同，將於明年上半年開始，至二○一四年分批交付。南車昨日開市見全日高位4.7元，之後反覆回落，收報4.43元，跌3.28%，令人失望，有指係由於競爭對手北車，今次連同前次累計動車組合同金額近800億元人民幣，略多於南車所致，但阿莊認為這不足以作沽售藉口，反而幾可肯定，未來兩年南車業績將高速增長，所以繼續持貨。

放大圖片	放大圖片	放大圖片

華潤水泥具號召力

新股華潤水泥（01313）將於十月六日上市，憑着「華潤」嘅號召力，相信表現唔會太差。昨見其他水泥股亦有異動，亞洲水泥（00743）亦重上5元樓上。今年上半年，亞泥實現純利3.23億元人民幣，同比增長89%，主要受惠銷量上升，以及四川水泥價格硬淨。假設下半年盈利與上半年相若，現價預測市盈率僅十一倍，加上派息有望增加，在同業中，其估值算係最吸引。

無可否認，內地水泥行業供應不斷增加，同業競爭日趨激烈，但亞泥勝在喺長江中游地區打好根基，並已成為四川地區嘅主要綜合水泥生產商，把握到災後重建及城鄉工程項目增加的商機。

隨着旗下湖北亞東廠一號新型乾法旋窰喺三月投產，亞泥嘅熟料總產能及水泥產品產能已分別增至830萬噸及1,200萬噸，配合地區銷情及價格理想，今年業績應有保證。除非內地經濟復甦勢頭逆轉，否則以目前嘅估值計，亞泥下跌風險有限，短線反彈企穩5元樓上，可望持續升勢，中期目標試衝6元關，穿4.5元止蝕。