本文重點
金管局總裁任志剛今日就Last Day，尋晚一班好有心嘅金管局伙記專登喺馬會同佢搞番個歡送會，為任總十幾年嘅金管局生涯畫上句號，總共有成二百幾位同事出席，明日就正式接任總裁嘅陳德霖都有出席，仲同任總進行咗「交棒儀式」，寓意未來肩負維持香港金融穩定嘅工作就由陳德霖揹起喇。
呢個交棒儀式係名副其實嘅交棒，因為係一支田徑場上嘅接力棒。任總面對咁多並肩作戰多年嘅伙記，真係千言萬語，唔知講乜好，惟有憑歌寄意，邊唱邊誦《My Way》呢首名曲。台下個個都聽得好入神，特別係任總嘅老婆同埋仔女。
同事送禮有心思
金管局嘅同事唔單止以張學友《祝福》回敬，仲整咗幾份好有心意嘅禮物畀任總留念。第一份係Q版行山公仔（因為任總閒時最愛行山）；第二份係用超過600塊Puzzle砌成嘅畫，最特別係幅畫係由600位員工嘅證件相併合而成；第三份係一本紀念冊，由同事寫下嘅心意卡組成。