內地籌備推出創業板嘅工作正進行得如火如荼，聽聞首批掛牌嘅創業板股份，市盈率達五十至六十倍或以上，真正係高風險市場。若然創業板成功吸引資金炒作，唔知又可以造就幾多「暴發戶」，屆時大家睇見創板股份炒得咁癲，對比之下，或會驚覺原來A股主板股份估值合理得多。

中央政府昨日在港正式發行60億元人民幣國債，乃首次在境外地區發行國債，此舉有助加強香港作為人民幣離岸中心嘅角色，擴大香港人債市場嘅規模。

講開金融，今年以來利息持續低企，樓市暢旺，唔少本地銀行都把握機會，積極搶佔樓按市場份額，新做樓按息率超低，就連金管局都睇唔過眼要出聲。

利息收入可望回升

表面上，銀行做埋啲冇肉食嘅生意，但實際上，銀行依家喺度播緊種，事關樓按年期一般唔會係兩、三年，而係十年、二十年咁長，大家都知道，利息唔會長期低迷下去，當利息重納上升周期，銀行相關業務嘅利息收入自然水漲船高。

本地銀行股之中，工銀亞洲（00349）有大股東工行（01398）嘅強大股東背景支持，金融海嘯一役，證明經得起風浪，今年上半年業績優於市場預期，主要受惠交易收益及經紀收入增長，加上信貸成本較低，因此，見中期業績公布過後，陸續有大行調高其盈利預測及目標價，其中高盛將目標價定喺21.9元，較現價高出約26%。

事實上，假設工銀亞洲盈利水平回復至○七年度嘅水平，現價預測市盈率十二倍、市帳率1.4倍，息率4.9厘。阿莊相信，下半年樓按業務、新股認購以及中小企貸款業務增長，將成為推動其核心業務增長嘅動力來源。基本因素穩健，亦令其股價增添防守性。

而且，再看其股價走勢，已經由月中嘅高位19.5元回落一成，相信喺15至16元水平具承接，若然嚟緊真係有平貨執，值得認真考慮一下。