本文重點
一年一度嘅胡潤富豪榜又出爐，今年邊位喺榜首呢？就係比亞迪（01211）主席王傳福。四十三歲嘅王傳福創立嘅比亞迪獲股神巴菲特入股，令其身家暴升，喺胡潤榜嘅排名好似坐直升機咁直升102位，榮登榜首。
巴菲特帶挈股價飛升
《2009胡潤百富榜》顯示，王傳福身家有350億元（人民幣．下同），成為內地首富。而○六年首富、玖紙（02689）嘅主席張茵家族身家330億元，排名第二位。
王傳福被稱為「技術狂人」，又稱「汽車狂人」，佢名下嘅比亞迪獲巴菲特入股10%後，股價「砰砰聲」咁升，今年升咗三倍，帶挈王傳福身家水漲船高，較去年豐厚咗290億元，仲一躍龍門登上榜首添。王傳福同張茵一樣，都係搞環保事業。
點解胡潤要喺海南清水灣公布胡潤榜呢？原來胡潤喺五月時，見到海南清水灣嘅宣傳單張，上面寫住It is your second life（這是你的第二次人生），覺得同自己嘅經歷不謀而合，要珍惜人生，做啲更有意義嘅事。