本文重點
金管局總裁任志剛明日last day，之後就可以優哉游哉咁過退休生活。呢個月佢真係忙到冇時間返屋企食飯，皆因歡送會排到密麻麻。尋晚銀行界同任總舉行咗一個好盛大嘅歡送會，太子去到會場，見到非常之墟冚嘅場面，因為是次宴會筵開35席，即係至少幾百個賓架同任總「餞行」，冠蓋雲集，任總嘅江湖地位直情可以用人數去表現。
高歌一曲《My Way》
席間銀行公會同銀行學會仲齊齊唱歌畀任總聽，其中包括無綫第一代《射鵰英雄傳》嘅主題曲《世間始終你好》、《獅子山下》同埋《We are the Champions》。聽完啲歌詞，太子覺得真係好似武林盟主金盆洗手。任總亦高歌一曲《My Way》回敬一眾賓架。
除咗唱歌表達吓大家感情外，當然唔少得致送紀念品。銀行公會同銀行學會好有心思，整咗一隻二十分鐘嘅DVD畀任總。DVD內容係由任總七十年代至今，出席公開場合嘅錄影剪輯片段。大家一次過重溫任總三十幾年嚟，由「黑頭任」忙到變「白頭任」嘅經歷。
三大發鈔行更加直接送錢畀任總，點解咁市儈？非也，送嘅係各行發行嘅一套「茄殊」，認真夠氣勢。