本文重點
十月份臨近，大家開始關注內地限售股解禁嘅問題，事緣今次限售股解禁嘅規模將達到1.97萬億元人民幣，乃股改以來單月解禁規模嘅歷史新高。不過，其實單係工商銀行（601398）、中國石化（600028）及上港集團（600018）三家公司嘅解禁市值已佔去1.88萬億元人民幣，比例達95%，故相關因素對大市所造成嘅潛在沽壓，不應被過分誇大。
近期大行開始轉移視線至表現相對落後嘅股類，如出口股、航空股，相信都係抱着博「遲來先上岸」嘅心態，事關喺明年比較基數大降及航油成本趨穩之下，出口及航空運輸數據點都會靚仔番啲，並為相關股份提供追落後嘅藉口。
講到航空股，北京首都機場（00694）股價喺次季反彈過後，第三季進行調整，惟上月股價回落至4.3元水平現承接，之後再現反彈，上周五收報5.02元，升2.6%，剛好重越50日線（4.97元），成交增至953萬股。
經營數據見改善
觸發股價反彈，主要係首機上月嘅運載數字有所改善。據報道，首機八月份飛機起降架次及旅客吞吐量分別約為4.3萬架次和626萬人次，較去年同期分別上升15%及40%，而今年首八個月累計飛機起降架次及旅客吞吐量，同比增幅分別為17%及21%，其中國內航線飛機起降架次累計增長24%，旅客累計增長約28%，國際及港澳台航線飛機起降架次累計下跌5.6%，旅客累計下跌1%。
阿莊估計，如無意外，嚟緊幾個月嘅營運數據會持續出現較大的同比增幅，而全年計，國際及港澳台航線飛機起降架次有望重現正增長，而國內航線起降架次則可保持雙位數字增長。
無可否認，首機現價往績市盈率以百倍計，但金融海嘯百年一遇，買股票最重要係睇前景。只要閣下相信明年航空業嘅經營環境可勝於今年，類似首機這些具戰略性國企股，值得作中長線布局。喺4.5至5元水平分注收集，順風順水，股價可望重返去年第三季（金融海嘯出現前），即6至7元水平。