26/09/2009

播放本新聞相關短片
 
股價號碼: 

Fundman睇市:新百貨轉形象發圍

退市似乎成為各國央行的「禁語」,股市三月以來大幅回升,原因二選一,一係預示經濟好快見到復甦(下場係退市);一係股市炒過龍。無論揀邊一個結局,都唔係普羅股民所願見。退市症候群在股市內廣泛傳染,投資者爭先恐後想鎖定既得利潤。

自由經濟學派常有批評政府唔應該對經濟施以無形之手,救市解了燃眉之急,避免去年信貸市場徹底崩瀉,不過,注資只係將問題押後浮現,各國政府唔可能在天文數字財赤底下,繼續無限量印發鈔票,出現今日救市容易、退市難的困局。本周港股跌幅已經算溫和,累積跌599點,昨日收報21,024點。多得新股孖展回流,港元短期拆息仲係相當低,三個月及半年分別唔夠0.2厘及0.5厘,一葉知秋,退市憂慮似乎仲係局限於股市層面,史提芬只係擔心,狼來了故事講多幾次,會愈來愈多人信以為真。

中冶(01618)後,又一隻新股首日破底,西裝股利郎(01234)收報3.87元,較招股價微跌0.77%,新股熱看來短期都要停一停、抖一抖!基金公司惠理(00806)八月底管理資產總值44億美元,比七月底減少4.35%,同八月份恒指跌幅4.1%相若;今年股市勁升,但唔少基金公司唔係太過受惠,由於唔少基金以最高位計算bonus,簡言之,係一日基金單位價格唔升穿上次高位,一日無表現獎金,單靠每年收取平均1%管理費(照計就係4,400萬美元或者3.43億港元)同認購贖回等有限收入,未有耐可重見○六、○七兩年大牛市,累積勁賺超過22億元的光輝。

芬佬仍鍾愛內需股

康師傅(00322)、恒安(01044)及蒙牛(02319)昨日均逆市做好,好明顯基金經理對內需股仲係不離不棄,唔憂中央閂水喉,對內地民眾消費造成多大的損害,始終芬佬睇中內地出口生意恢復○七年光景前,內需都要唱住獨腳戲,繼續推動經濟。

筆者對新世界(00017)旗下新世界百貨(00825)在港分店印象一般,公司顯然志不在此,數百萬人彈丸之地點及十三億人口市場,目前集團在內地多達33間分店,最近斥資億元全面翻新,管理層也積極與傳媒及芬佬會面,似乎有不再低調之勢。

論估值,新百貨比百盛(03368)、金鷹(03308)都平,新百貨預期市盈率21.6倍,後者分別為29.2倍及32.7倍,假如改形象可以拉動估值睇齊,潛力唔可以睇小,而且新百貨手上現金近31億元,差不多是市值三成,即使減去貿易貨款,都有近20億元,財政上安全得很,股價連續兩日大成交向上,宣傳工夫做足有火燒冷灶的情況,下星期不妨留意。

史提芬