外圍偏軟，早段內地股市亦下跌，恒指一度失守21,000關，午後內地股市倒升，港股跌幅收窄，恒指險守二萬一，收報21,050點。個市開始跌，志強怕死無入場，不過睇番唔少二三線股表現又唔曳，好似批完股唔死的光大國際（00257）同高盛入股的吉利汽車（00175），仍能逆市上升，肯博肯追又唔係話無得搵食。志強長線持有國美（00493）策略不變，花旗最近出報告建議買入，加上內需股被睇好，有實質業績支持，唔怕畀耐性坐貨。
天津創業環保（01065）昨日逆市上升4.4%，高收2.11元，收復10日及50日線，加上成交回升，相信調整已完成。再睇光大國際同屬水務股，批股後有如此強勁表現，可見大行睇好行業發展，早前高盛亦曾調高創環的盈利增長預測。
環保是國家政策扶持的重點行業，天津創環以污水處理為主業，穩步開拓市場，市場定位為立足天津，並成為服務全國的水務投資營運商。該公司的管理層日前披露，正與天津市政府進行深入磋商，爭取城區內40座污水處理廠特許經營權，年期長達三十年，其業務規模未來將以倍數壯大，前景值得睇高一線。