中冶H股發行量28.7億股，以掛牌首日成交12.2億股計，易手比例大約42.5%，或者今日無論大孖沙同散戶，炒新股炒到心紅，奉行唔贏唔走，睇番前日上市尚有微利的國藥（01099），首日易手比例就比中冶高出一截，去到62.8%。

中冶現價仍然貴

筆者講過無數次，話新股定價經過保薦人精密計算，散戶要賺錢一啲都唔容易。睇番中冶，A股加上H股，股數達195億股，以5.61元收市價計，市值近1,094億港元，但出年預期盈利不過41億元人民幣，雖然插咗水，但市盈率仲有23.5倍，真係一啲都唔平，是否仲要死守？股民要自己諗清楚。

大跌市，又係搵嘢買嘅好時候，留意到中銀香港（02388）連跌幾日之後，去到17元附近有跌唔落迹象，似乎開始有留意價值。

中銀早輪出的中期成績表帶來驚喜，上半年盈利只微跌5.6%至67億元，雖然淨利息收入跌近11%，可是淨服務費及佣金收入不跌反升1.7%，至29.47億元，更比去年下半年大幅反彈29.3%。原本以為雷曼事件嚇親存戶，至少對非存款類別的投資，會有一段時間抗拒，影響服務及佣金收入，殊不知實際情況並不太壞，儘管有分析員批評中銀無提到高達27.59億元的迷債回購計劃開支，但這筆損失大家心裏有數，遲早要還，反而唔錯嘅經營情況，對中長線投資者甚為吸引。

中銀股價業績後玩高台插水，由18.66元跌到尋日最低16.9元，但實屬非戰之罪，原因係唔少大孖沙追蹤的富時中國25指數，準備重新釐定指數基準，把紅籌由發展市場指數，調到新興市場指數內，新定義下，紅籌至少要有45%收入來自內地，中銀香港是中銀系香港旗艦，自然要被剔出指數，十月六日正式季度檢討公布，佔指數比重4.5%的中銀香港，難免要捱沽，當然這實際是無損這銀行的經營。

清倉行動快完成

大行野村估計，有40億貨值的中銀香港股份，會因此排住隊被飛出街，以歷史成交額計，大約需要九至十日消化。但從中銀成交連續四日縮減看來，清倉行動可能已進行得六六七七，下月六日前，會係中銀香港粉絲入貨的好時機，密切留意。