光大國際（00257）昨日宣布按每股3.03元配售4.8億股，集資14.38億元用於發展環保業務及營運資金，配股股數相等於經擴大已發行股本的13.2%。

光國今年上半年純利1.96億元，同比增長47%，相等於去年全年純利58%。按上半年整體業務嘅增長速度，料其業務自然增長足以抵銷是次配股對每股盈利所造成嘅攤薄效應。

期內，集團已落實26個環保項目，總投資額66億元人民幣，設計總規模為年處理生活垃圾260萬噸、而污水處理項目嘅設計總規模為日處理污水約150萬立方米。而環保水務項目進展順利，其中濟南歷城及周村項目已開始試產，加上部分污水項目收費獲上調，收益將可保持較快增長。

至於新能源業務，旗下嘅沼氣發電項目已開始帶來盈利貢獻，另公司計劃投資污水源熱泵項目、風能、太陽能及生物質能項目。

環保股唔憂冇市場

可以預期，未來兩年公司將進入投資高峰期，截至六月底，公司手持現金及等值物約9億元。配股集資，未嘗唔係一個低成本嘅融資方法，加上以今次配股價計，往績市盈率二十八倍，算係理想，亦反映市場對內地環保股有一定需求。昨日遇上跌市，但光國未失配股價。考慮到市況因素，較穩陣嘅做法，係等喺今次配股價或以下水平才分段入市，憑着產業政策支持，加上公司業務已上軌道，未來兩年將步入收成期，前景值得期待。