鄭大班屆退休年齡

講開鄭大班，今年都六十有多，已屆退休年齡，加上又要身兼中大校董會主席呢個既勞心又勞力嘅公職，鐵人都難頂啦！所以若然佢要退休，去另一個領域貢獻香港，專注做中大嘅工作都唔出奇，之不過鄭大班始終係一個人才，而獅子銀行嘅阿媽大笨象又搞緊A股上市，如果佢喺呢個時候退休，對大笨象來說絕對唔係適當時機，如果太子係董事會嘅成員，都唔想畀佢咁快退休啦！

側聞大笨象董事會呢個星期正好喺香港開會，唔知鄭大班嘅崗位會否成為會議嘅議題之一呢？到底鄭大班未來會瀟灑而去，抑或會換換崗位？點樣可繼續服務獅子行，又可以撥多啲時間做公職，以獅子銀行董事會成員嘅智慧，一定會有兩全其美嘅安排，話唔定好快就揭盅！