24/09/2009

播放本新聞相關短片
 
股價號碼: 

Fundman睇市:361度啱價值投資者

港股在高位仲係無方向,表面上成交有588億元,稍為勝過前日唔夠500億元,不過減番國藥(01099)首日掛牌嘅65億元,話成交回升都只係得啖笑。

美資行高盛一向畀人無寶不落嘅感覺,尋日以接近19億元認購吉利(00175)五年期可換股債券(CB)及3億份認股權證,CB行使價每股1.9元,比停牌前股價1.79元高出6.1%,但消息一出,吉利股價急升到2.13元,倒過來已折讓11%,邊個仲敢話投行金漆招牌唔值錢?港府三年期票據息都唔夠0.93厘,吉利股息率預期只係0.8厘左右,但揸佢嘅CB,未來五年,年年穩收3厘息,真係抵到爛,筆者講嘅係「高盛」。

國藥首日掛牌,表現令人失望,證明到新股招股反應,同往後股份表現無直接關係,七月初招股時鬧得熱烘烘的361度(01361),上市一度逼近4元之後,很快便無以為繼,到尋日業績出籠,股價急升一成八,過去兩個半月被綁的股蟹才總算有鬆綁機會。

第四季業績如有神助

361度截至六月底止年度賺6.32億元(人民幣.下同),增長2.53倍,股民起哄,緣於出來的結果遠遠高過招股時預測的5.53億元利潤。睇番招股文件,首三季稅前利潤才4.3億元,結果出來全年達7.4億元,換句話說,四至六月的內地傳統銷售淡季貢獻3.1億元,等於全年的42%,係招股時刻意示人以弱?抑或第四季度確係如有神助?睇怕要等分析員見過管理層之後,在報告中代為解畫。

年結日唔同,筆者就簡單地以最新全年業績比較,三大內地運動品牌,論銷售額以李寧(02331)居首、安踏(02020)第二、361度排尾;論盈利,安踏賺8.9億元排第一、李寧賺7.2億元排第二,361度都係排第三。有趣的是,三股估值差距極大,一○年預測市盈率,李寧20倍、安踏15.7倍,361度只得8.6倍,平近一半,可見睇過海外品牌像Nike與其他牌子血拚的芬佬,仲係傾向唔大唔買。筆者都較相信品牌營運上,是強者愈強,不過鍾情價值投資者,或者361度會是你杯茶。只是從估值差距顯示,相信大衞會打敗巨人歌利亞的真係唔多。

史提芬