大市尋日早段都頂得吓，中航科工（02357）表現亦都唔錯，股價一度高見2.88元，主要因為旗下洪都航空發盈喜，惟大市午後顯著回落，中航科工升勢亦無以為繼，最後以2.72元收市，無升跌。
中航科工一直具母公司注資憧憬，而早前國務院國資委已批准公司向中航汽車轉讓所持之哈汽集團100%權益，預期中航科工今年可完全剝離汽車業務，之後母公司中國航空工業集團便會注入資產，主要涉及航空相關業務，包括飛機製造、發動機及航空系統等。
中航科工母公司目前擁有二十一間上市及非上市公司，預料會注入的航空資產，保守估值達1,500億元人民幣，所以中航科工前景絕對可以睇好，而且喺注資憧憬下，股價跌極有限，唔怕逢低買入。
利豐（00494）在大行唱好下，尋日走勢凌厲，睇格局應該可以突破一年高位31元挑戰新高，可以作為配腳，至於另一隻腳就揀隻宏華集團（00196），雖然佢成交唔大，但係尾市好明顯有大盤掃貨，估計隨時開車，可冷敲。