金融海嘯之後，香港樓價嘅V形反彈，確令唔少人大跌眼鏡。前幾日，任總臨別贈言，叫銀行承做按揭唔好太過進取，慫恿買家罔顧利率有掉頭回升的風險。講到底，其實樓市狂態畢呈，息低只係其中一個因素，基本經濟學上供求關係變化，亦是原因之一。內地有錢人源源不絕透過買樓移民，或者存心炒樓買入香港物業，帶來新的需求。而在供應層面上，政府勾地計劃變相限制土地供應，威力同樣唔細，地產商買唔到地，惜貨之餘，落成物業都自然要賺到盡，三五七萬蚊呎的包裝豪宅，應運而生。
田生現價嫌偏高
強制拍賣的政策，令更多發展商轉移陣地，透過舊區重建收地增加土儲，田生（08136）一類「收買佬」被股民熱捧，不過收舊樓無乜商譽溢價，反而愈低調愈好，最緊要的是資本，入行屏障唔高，田生市帳率1.5倍樓上，似乎有點過高。
尋日老牌「釘王」金朝陽（00878）出中期業績，走勢引起筆者注意。金朝陽中期賺6.96億元，比○八年同期升5.6倍，筆者多次提過，地產類股份盈虧意義唔大，資產豐厚與否，同埋股價折讓多少，方為關鍵，金朝陽上半年盈利大升，主要來自投資物業公允值增益5.84億元，相等於盈利的八成四。睇番去年底，旗下投資物業總額是60.8億元，一除之下，等於一至六月組合升值咗9.6%。
即將步入收成期
田生市值12億元，股東資金7.6億元，對比之下，金朝陽市值15億元，卻有45.3億元的股東資金（由73億投資物業與21億負債及其他元素組成），毫無疑問更能受惠「磚頭」漲價，睇番過去一年，公司統一希雲街項目業權，在建的有銅鑼灣登龍街及大坑華倫街項目，未來兩年會係收成期。
美中不足係金朝陽管理透明度唔高，手揸大量舊樓要等落實重建才有回報，所以資產回報率表現唔多穩定。睇番過去幾年，金朝陽股價比資產淨值存在折讓，幅度介乎45至91%。值得留意的是，45%的低位乃在○七年樓市高峰時錄得，近期樓價又向高點邁進，如折讓去番當日水平，可見10.5元。儘管投機味有點濃，但衡量值博率後，金朝陽有得諗。