五十八歲嘅AA（艾維朗嘅英文名縮寫）仲有兩年就到公司規定嘅退休年齡，早前佢向電盈員工披露，已經同公司傾接班問題，得出嘅結果係AA延遲退休對公司上下會較為有利。

獲七年免息貸款

但做到幾時？太子就唔知。不過，尋日公司咁啱出咗中期報告，就披露咗一啲佢同大老闆嘅新協議，唔知係咪暗示咗大家嘅合作年期呢？

AA一向是主席李澤楷最倚重嘅得力助手之一，剛發出嘅中期報告就披露，AA與李氏嘅私人公司早前訂立一份總值1,000萬美元、為期七年嘅免息私人貸款及為期七年顧問聘用協定，咁即係話AA獲貸款後，在未來七年會繼續為李氏効力，仲講明話顧問費用足以喺七年內償還呢1,000萬美元。呢份「貸款+聘用」協議，唔知同佢延遲退休有冇直接關係？亦唔可以肯定AA係咪會留喺電盈直至佢六十五歲生日，只可以話，58+7就等於65，李氏會繼續係AA嘅老闆，直至AA六十五歲為止。