鄭海泉鄭大班早前豪擲190萬元人民幣，幫襯自己公司買人債，實行身體力行咁撐滙豐！依家佢獲批到96萬元，計計埋埋，兩年唔計升值，已經可以穩袋約5萬蚊人仔利息。
撐滙豐中國擴業務
滙豐人債超購1.2倍，鄭大班抽到一半人債，條數都係差唔多。折合番港紙計算，利息大約係5.66萬蚊。
人債兩年期先賺到5萬幾港紙，比起鄭大班嘅年薪，真係濕濕碎！鄭大班當然唔會貪嗰少少錢，人債集資所得淨額係用於滙豐中國擴展業務的一般融資用途，所以佢當然要捧場啦！
之前先辛辛苦苦兌咗190萬蚊人民幣，依家就用咗96萬蚊人民幣買滙豐人債，剩低嗰94萬蚊人仔做乜好？計太子話，一於買國債好喇！