本文重點
太子有次同招商局（00144）常務副總經理胡建華食飯講開佢個仔時，胡總笑晒口咁話，個仔家陣喺澳洲讀緊高中，就嚟考大學，佢喺內地讀書時表現無咩特別，但一去到澳洲，胡總就發覺，原來中國人真係好叻吓，事關每年學校有好多比賽，佢個仔都有獎攞，就算喺啲番鬼佬至勁嘅游水比賽，佢囝囝「係咁意」參加吓都攞冠軍。
跟國家教練 游水攞獎
點解會咁犀利呢？原來喺呢個「係咁意」嘅背後，胡總呢位爸爸投入咗好大嘅精神去培養，事關佢個仔自細就好多嘢學，仲學親都係跟名師，就好似游水咁，佢個仔十一歲就開始跟國家級嘅教練學咗好多年，呢個「係咁意」真係唔易呀。
胡總仲好謙咁話，點解家陣中國人去到外國好似樣樣都掂咁，重點係中國一孩政策，咁啲屋企咪惟有將全部精神同心機都放喺一位小朋友身上囉，想唔優秀都幾難呀。
太子心諗，鬼叫佢個仔有個咁出色嘅老竇咩，事關胡總都唔嘢小，佢工作經驗唔使多講，仲係喺英國伯明翰大學讀碩士及喺澳洲國立南澳洲大學讀埋工商管理博士學位添，個仔遺傳咗胡總嘅先天，再加後天嘅培養，又點會唔係精英呀？