可惜志強隻國美（00493）逆市下跌，德永佳（00321）亦係同一命運，反而早兩日沽咗大冶有色（00661），呢兩日好似幾好，企穩0.9元樓上，或者要再吼番。

新股同半新股再度熱炒，雖然早幾日明星新股中國生命（08296）已開始派發兼回吐，但見半新股又落鑊，今日吼吼中國秦發（00866）。煤價回升，對上市後公布首份差強人意業績的秦發帶來支持，昨日股價爆升逾兩成，終於尋底成功，似要再展升浪。

秦發上市後，股價曾高見3.56元，不過受累中期業績倒退逾九成，股價較早前被質低至1.69元。期間獲內地股壇大好友西京投資管理的主席垂青，在股價低殘期間密密增持，目前持股量低於5%，但唔排除遲吓有機會增持至需要披露水平。

即使「女股神」劉央未有透露共買入多少秦發，但得西京欽點，相信秦發股價已見底，呢個價上車，博上50日線，即2.6元水平，都有兩成利潤。