濱海股價經過個多月嘅整固，尋日破位而上，高收0.55元，升4仙，升幅7.8%。一支大陽燭升穿由七月底高位0.65元回落形成嘅下降軌阻力，成交大增至8,200多萬股，較上個交易日增5.8倍，而MACD亦現雙牛買入訊號，可確認調整完成，大升浪展開，照度上去，短期最少可見0.75元，中線睇1元樓上。

事實上，濱海大股東天津泰達係天津市同濱海新區嘅大型國有企業，獲授權管理同經營國有資產，並已參與天津市嘅水務、能源、燃氣供應等公用事業，亦從事財政、基礎建設、保險、工業、海洋發展、房地產開發以及生態保障同風險投資等，總資產值逾1,300億元人民幣。

大股東部署入主濱海已近兩年，料注資步伐會加快，而注入資產相信亦會好龐大，由數十億元到過百億元嘅注資陸續有來，務求將濱海極速壯大，前景要另眼相看。

濱海投資（08035）　目標價：0.75元　止蝕價：0.50元