相對上,滙控管理層就無股市投資者咁樂觀,主席葛霖早前就大唱反調,認為海嘯最壞時刻即使過咗,但佢相信銀行業未完全脫困,未來的路仍然難行;雖然管理層「放冷氣」,可是《金融時報》引述上海市政府金融服務辦公室主任的言論指,明年初會有一、兩家外國公司在上海證交所上市,股民對號入座,聯想到中期業績時,葛霖表明心迹想登陸A股,順理成章成為首批發A的大熱,加埋內地傳媒繪影繪聲,話滙控已委託中信證券擔綱保薦人及承銷商,憧憬滙控發A的預期全面升溫。
的而且確,滙控在北美營運上損兵折將,業績出現猛烈震盪,不過,滙控的跨國銀行網絡、廣大的客戶基礎,以及輝煌的管理紀錄,都並非市值更大的內地銀行可以比擬,市場共識係內地股民會畀滙控一個慷慨估值,從而拉動在港股價,這個預期合理,史提芬相信即使滙控本身,也對發A興趣極濃,提升資本後,一來封住過去十八個月來一直指滙控仲有集資壓力的分析員把口外,也可以趁歐洲銀行股元氣未復,向內地股民攞錢過江再執平貨。
業績不難重返高峰
滙控市值1.58萬億港元,或者2,040億美元,相當於六月底止股東資本1,184億美元的1.72倍,同埋往績平均值的七成五左右,儘管今日唔少分析員把銀行商譽價值撇除(滙控TNAV是2.28倍),但對一間持續營運的銀行來說,這做法其實有點荒謬,等於話「HSBC」四字招牌一毫子都唔值!在海嘯中今日唔知聽日事,隨時有銀行執笠的時候還說得通,太平盛世下,這種估值方式明顯是不合時宜。
隨着各國央行推出人類史上最大手筆救亡行動,金融市場回復平穩,信貸風險損失高峰期過去,甚至部分過度撥備的金融資產,未來兩年有回撥可能,滙控業績唔難在兩至三年間,回到○四年120億至130億美元水平,亦即歷史估值大約十六倍的水平。或者錯過喺三、四十蚊買貨的,會懊惱不已,但左計右計,即使重返90元樓上,如果有心持有超過兩至三年,現價其實仲係相對合理,待其登陸A股之後再上車,可能已經太遲。