本文重點
恒隆地產（00101）董事長陳啟宗喺舊年年底金融海嘯嗰陣，已經講明為咗縮減開支同埋共度時艱，會向執董「開刀」減人工，果然喺最新公布嘅年報顯示，陳啟宗自己「身先士卒」，董事酬金減咗超過20%，只有2,750萬元，董事總經理袁偉良減幅仲勁，達到22%，總酬金只有2,540萬元，另外兩名執行董事吳士元同埋高伯遒嘅董事酬金亦都減咗超過18%，分別至1,380萬元同埋1,240萬元。
四高層花紅縮77%
不過，今次董事酬金減少，並唔係真係減佢哋份薪金，而只係大減花紅，佢哋四名管理層今次加埋嘅花紅只有1,720萬元，比起○八年度嘅花紅總額7,580萬元，大幅縮水77%。
其實班執董又唔使唔開心，因為老闆陳啟宗喺年報都話踏入二○一○年代，將會係集團嘅黃金時期，由明年開始，集團喺內地每年最少有一個商場項目落成，為未來嘅「黃金十年」提供穩定嘅租金收益。再者，早前恒隆地產又賣咗咁多個君臨天下園景單位，嚟緊嘅收益應該唔錯，○九年度減咗嘅花紅分分鐘喺一○年度翻番嚟。
陳啟宗早前都話五年內投資400億元喺內地項目，已經接近完成，計埋匯率，依家已經投資咗383億元。不過，佢喺年報都話，喺未來十二個月內，有機會可以再增添一至兩幅地皮，太子等佢好消息。