颱風影響，尋日股市剩番下半場，有322億元成交已經算唔錯，21,000點依然係好淡雙方對峙的重要關口，尋日藉推低中移（00941），淡友先勝一仗，志強相信短期仲係波幅市居多，中長線睇，只要外圍無大問題，港股升穿21,300點阻力的機會，仲係比重返20,000點樓下為大。
市場無消息炒，又驚內地銀根逐漸收緊，內房及內銀股無運行，反而內需股表現亮麗，豬肉股雨潤（01068）自業績曝光後，每日升少少，走勢甚佳。
此外，由紡織股搖身一變進軍內地時裝零售的德永佳（00321），都算大半隻內需股，近期走勢對辦，由月初6.1元抽上7.28元，近日稍為整固，走勢似係旗形突破的前奏。
今年三月底止業績，德永佳盈利跌7.1%，得8.6億元，紡織業在金融海嘯下出口減少，經已完全被增長中的零售分銷生意抵銷。
街外估今年公司可賺超過9億元，市盈率十倍左右，破位在即加埋估值唔貴，一於將收day low走勢麻麻嘅大冶（00661）止蝕，實行來個跟紅頂白。