旭光（00067）自六月中上市後，見中資大戶全面吸納，股價反覆升至3.96元高位後，先至回落調整，股價於3.2元水平再經一輪嘅收集後，貨源料已歸邊。尋日買盤再湧現，搶高至3.53元收市，大升0.27元。已突破由七月底高位回落形成嘅大型三角形阻力，半日成交較上交易日大增逾倍，可確認新升浪已展開，若能升穿前高位3.96元，短期可向5元水平進發。
旭光從事天然芒硝產品嘅開採、加工同製造，擁有四川三個礦區，現時開採中嘅兩個礦區，年產能達160萬噸，為全球第二大生產商，以○八年產量計，佔中國市場份額23.2%，亦佔全球份額11.3%。
旭光預期今年盈利不少於5億元人民幣，每股獲利約0.3港元。明年產能增75%後，保守估計每股獲利0.5港元，以目標價5元計，市盈率只有十倍。
旭光產品需求大，毛利率特高（達69.8%），加上明年產能大增，可以話係一隻不折不扣嘅高增長股。