昨日本欄推介嘅創維（00751），開市價2.8元，上到2.92元及2.93元先至各追到5萬股，之後股價突破3元關，收報3.26元，升15.6%。若然再來一支大陽燭，料快見3.5元目標價。

太陽日誌

放大圖片

粵海投資（00270）宣布截至今年六月底止中期業績，期內收入39.34億元，同比增長4.5%，純利10.09億元，同比增長12.6%；每股盈利16.37仙，派中期息每股5仙。整體而言，由於期間內地經濟觸底，粵投呢份業績算係唔錯，足以反映其業務收益基礎穩定嘅特性，加上中期派息同比增加25%，消息正面。

期內，供水業務收入20.65億元，增長14%，佔總收入52%，經營溢利12.9億元，增長31%。物業相關業務經營溢利2.52億元，同比雖降24%，但相對於去年下半年嘅情況，可確認低潮已過。百貨營運表現穩定，經營溢利1.15億元。

去年全年錄得經營虧損達2.81億元嘅發電業務，今年上半年經營虧損縮減至3,279萬元。可惜酒店業務受金融海嘯衝擊，上半年轉盈為虧，錄得經營虧損1,496萬元，抵銷了發電業務虧損收窄嘅影響。

供水業務收入穩定

基本上，自粵港簽訂了二○○九至二○一一年供水協議後，粵投未來三年的收益基礎已有好大的保障。另外，早前公司宣布買入天津地皮，擬將廣州天河城嘅成功經驗帶到天津，長遠而言有助擴大物業組合及百貨業務收益貢獻。

由此可見，喺供水、物業同百貨業務嘅鐵三角支持下，粵投嘅盈利預測能見度高。以現價計，預測市盈率約十倍，息率約3厘，而股價喺3.5元有強大支持，上升動力須視乎公司落實新投資嘅進度，如投資水資源、公路等新項目。