本文重點
新世界發展（00017）主席鄭裕彤「彤叔」，一向畀人泰山崩於前而面不改容嘅印象，所以「沙膽彤」美譽無人不識。尋日係九月十五日嘅大日子，即係金融海嘯大引爆嘅分水嶺。太子問佢對於金融海嘯嘅感想，佢畀太子呢位後輩嘅回應就係要樂觀、自信、積極。
不亂陣腳 否極泰來
彤叔話，「金融海嘯經已過去，我吸取到嘅經驗係，只要心態保持樂觀積極，不自亂陣腳，自會否極泰來。」
回顧番舊年金融海嘯初起，彤叔已率先走出嚟呼籲大家冷靜，強調香港是福地，有內地嘅支持，經濟唔會太差，更加幫中小企吐苦水。不過，後來竟然連彤叔都被海嘯波及。
大家應該仲記得，今年一月八日，新世界股價急升穿10蚊，市場就突然放出彤叔入院嘅謠言，搞到新世界股價大插水，收市後就見到彤叔精神奕奕咁企响新世界大廈，謠言不攻自破。