近期美匯指數跌穿78重要心理支持，市場開始驚奧巴馬的首回合經濟振興方案藥力唔夠，可能要開第二劑藥，大量增加美元供應，結果將美匯推進新一輪的跌浪。

港元跟美元掛鈎，要跌一齊跌，到底買股票或磚頭，今次有冇回報係未知之數！但可以肯定揸現金必成短期大輸家，聯儲局情願見通脹都唔願見到經濟重蹈大蕭條的覆轍，低息期有長無短，配合美匯弱勢，只會令資金更積極搵出路。

買內銀股抗貶值

其實，以港元投資人民幣收入為主的國企，都係對抗貶值的方法之一，內銀股估值雖然已遠高於今年首季水平，但唔少預期市盈率仍在十三至十七倍水平，與其走去抽新股，配得一兩手搵餐茶，不如買落去睇半年時間，穩陣得多之餘，亦可以避免揸現金等貶值。

內銀對香港的一紙銀行牌照一向都虎視眈眈，近日又傳工行（01398）對永亨（00302）有意思，刺激有賣盤條件的二線銀行連續兩日發威。主角永亨尋日升2.5%、大新金融（00440）升4%、大新銀行（02356）更升11.2%。

賣枱憧憬炒唔停

史提芬一向唔懷疑本地銀行家意興闌珊，要錢唔要貨的可能性，有個銀行家朋友話，依家中小銀行經營查實比十多年前困難得多，單係樓按淨息差，就只及當時一半左右；其他非利息業務一樣唔易做，基金銷售或者衍生工具投資，已經比保險公司搶唔少生意，經過雷曼一役後就更係麻煩，唔可以逼Sell客之外，前線人員又要再培訓，銷售過程更要錄音無得抵懶，完全唔合乎成本效益。

不過要大股東首肯賣枱，仍需要一個吸引嘅價錢。回顧永亨與大新金融年初至今累積升幅分別達68%及1.33倍，但○九年度預期市帳率分別只係1.94倍及1.11倍，即使唔諗永隆當日賣枱畀招行（03968）的3.1倍天價市帳率，但九九及○四年香港的經濟復甦期，當時兩間銀行市帳率亦都去過大約2.3至2.5倍水平。

總括而言，筆者未必想同本地銀行股做人世，但現水平買入大新金融揸六至十二個月，值博率似乎都算幾高。