阿莊仍然持有嘅北京控股（00392），昨日股價以大成交上破40元。事實上，北控股價已橫行咗兩個多月，若然可以靠穩喺40元樓上，有望重現六月份嘅升勢，一係唔行，一行就升足一個月。此外，本月初阿莊推介過嘅玖龍紙業（02689），亦以大成交向上突破，昨日收報10.3元，升7.7%。陸續有迹象顯示，美國市場正在加快復甦，照計追入玖紙有心唔怕遲！

早前阿莊亦曾買過隻富士康（02038），但由於遇上跌市，所以蝕少少走咗。不過，撇除市況因素，阿莊認為呢隻股基本因素正在改善嘅睇法並未有改變，值得繼續留意。

本月初，富士康將連年虧損嘅富士康精密煙臺股權悉售予母公司，套現2.24億元人民幣，交易尚待有關部門審批。公司願意剝離虧損業務，套現強化財務狀況，未嘗不是一個好消息。另外，據講富士康擬於明年推出Smartbook，售價可能介乎100至200美元。由於如今市場對於小型筆記本電腦需求甚大，新產品有望為公司業務建立新嘅增長點。

受惠外判定單潮

如今歐、美市場尚在復甦初期，不少當地廠商見未睇通後市，不敢貿然投資於生產設備，傾向暫時將定單外判予內地，類似富士康這類大型代工生產商正可受惠，估計嚟緊年尾嘅傳統旺季，新增定單表現不俗，股價上升潛力不容抹煞。是故，阿莊心思思想翻兜富士康，短期會先觀察5元關承接，守於其上可小注跟進，博年底前重上6元，穿4.6元止蝕。