內地股市連升六日，上證指數昨突破2,900點關，港股先低後高，恒指午後亦重上21,000關，升幅超過500點，報收21,069點。咪以為個市升，志強會有斬獲，偏偏二三線股個別發展，咁唔好彩，志強所持國美（00493）逆市下跌，不過既屬長線投資，當然繼續持有。
至於駿威（00203）早段一度突破50日線，可惜又企唔穩，志強以3.7元沽出，都係食胡先算，有胡唔食，罪大惡極。另以每股5.1元買入10萬股馬鋼（00323），金價升到飛起，其他貴賤金屬價亦跟住上，短炒博上番五十二周高位。
自上周第一視頻（00082）回復強勢，個別股仔見異動，其中昌興國際（00803）走勢亦有改善，成交雖未重返最當炒時的水平，但股價在0.6元明顯有承接，並逐步完成收集。昌興國際從事買賣熟料、水泥等建築材料，同時又開採和加工花崗岩產品。華潤水泥快將上市，昌興具影子概念，料可對短期股價帶來刺激。另一方面，唔少內地私募基金一直有捧昌興場，依家內地唔再驚閂水喉，只要北水繼續南流，昌興又可重拾動力。