這幾天臨近尾市成交均明顯增加，相信確有傳統基金喺等唔到買平貨嘅機會之下，惟有硬着頭皮入市掃貨。事實上，早前恒指調整，唔少人都清倉獲利，呢幾日大市反彈，亦趕不及補倉。若然大戶真係有心挾倉，相信本月恒指可向22,000點推進，而催化劑可能來自內地落實廣東非深圳戶口居民赴港個人遊措施、本地新股表現，又或是月杪基金季結等因素。

講開新股，今日有兩隻新股掛牌，分別是現代傳播（00072）及中國生命（08296）。雖然本地亦有現成上市公司沾手經營墓園或投資殯儀業，但論真正專門做殯儀起家嘅，則中國生命應屬第一家。以中國人口之多，以及殯葬業發展之分散，行業長遠發展確有可為，但問題係中國人對於殯葬之事存忌諱，要投資者了解和受落，睇怕需要一段時間，至少要等待公司交得出經營成績，才能成氣候。

太陽日誌

放大圖片

收購金礦壯大規模

最近國際金價突破每安士一千美元，刺激金礦股發圍。阿莊仲好記得，牛年首個交易日，本欄見報推介招金礦業（01818），當時股價只係6元左右，四月再次推介，指股價喺10元樓下可以再買，年底前目標見13元。結果，該股昨日收報14.28元，表現之佳確令人喜出望外。

上半年，招金賺3.197億元人民幣，同比增長49%。過去年多招金收購多個金礦，並積極加以整頓，今年將全面展現成效，加上受惠金價上升，資產和盈利都水漲船高，只要控制成本得宜，全年計業績值得期待。

由於金價才剛突破重要心理關口，正所謂「升市莫估頂」，招金昨日以大成交重上14元樓上，走勢亦甚強，年底目標可順勢上移17至18元水平，向下11至12元為主要承接區。