本文重點
金管局總裁任志剛離任在即，大大話話已經奉獻咗十六年畀金管局，今日係佢喺金管局過嘅最後一個生日，不過金管局同事無特別舉行活動同佢慶祝，喺月尾先幫佢搞歡送會，可能到時一次過慶祝埋生日！
太子收到風，個歡送會選址喺馬會舉行，唔知同任總鍾意做馬主有無關係呢？更加令太子期待嘅，除咗一眾金管局同僚聚首一堂，如果任總拉住愛駒「自己友」出嚟，就真係同班同事襯到絕，因為大家都係「自己友」，當然退役名駒「有錢賺」同「威將名駒」都一樣會好夾。
飯敍無啖好食
其實任總喺金管局最後一個月，真係可能忙到有飯都無時間食。因為太多歡送會太多應酬，任總市場地位咁高，財金界有分量嘅高層，都想同佢食餐飯敍舊歡送，上咗菜都要繼續傾偈，真係未必得閒食嘢。
任總「法定生日」雖然係一九四八年九月九日，但多年前佢講過佢由內地嚟香港，潮流興報細數，所以喺一九四七年生日嘅佢就報細咗一年。