本文重點
上周五內地A股收市後，有關部門突然宣布放寬QFII嘅額度及鎖定期，印證中央政府落實「維穩」股市決心，港股喺短時間內升幅顯著擴大，期指全日波幅超過800點，淡友冇仇報，恒指收市升556點，報20,318點，大市成交明顯增加至759億元，可視為轉勢訊號。
高盛證券發表研究報告，指市場排名前四位的半導體公司，第三季晶體總付運量按季上升接近15%，加上庫存逐步消化，認為相關股份具防守性，且可能出現復甦，故將ASM太平洋（00522）嘅目標價上調1.9%至55元，該股上周五收報49.35元。若然呢隻大價科技股嚟緊走勢真係對辦，相關二、三線股亦可多望兩眼，如上周阿莊提及嘅晶門（02878）自然亦係其中之一。
中期業績料有驚喜
個人衞生用品股恒安（01044）上周宣布中期業績，純利9.67億元，同比增長54%。毛利率上升5.8個百分點至45%，利錢甚佳，做生意做到好似印銀紙咁，真係唔簡單！歸根究柢，公司喺原料價格低潮時大量入貨，致使上半年銷售毛利率顯著提高。
從事製造機械嘅企業亦可受惠上半年原料價格下跌，就如專門產銷裝載機、壓路機、挖掘機、起重叉車及其他基建機器嘅龍工（03339），本月下旬將公布中期業績，如無意外，毛利表現會較去年下半年有明顯改善。
講起龍工，公司兩年前發行咗一批零息可換股債券，由於換股價高達每股9.79元，相信獲行使換股嘅機會不大，持有人可要求公司喺明年四月底前以本金額嘅112%作出贖回。故見近期龍工多次回購該批可換股債券，而八月初，公司宣布建議發行二○一四年到期，為數1.35億美元的零息可換股債券，集資10.27元，換股價7元，基本上已為贖回作好資金準備。
再看核心業務，受惠內地大力推動基建，加快都市化，龍工嘅產品需求殷切，若然月底公布前嘅業績確認銷售已重拾正軌，有機會觸發新一輪升浪，目標見6元，跌穿3.95元止蝕。