國家即使要調控過熱產業，但推動內需以減低對出口依賴，已經係長期國家策略，睇番涉及內需的股份，很多都不受影響，發揮避難所角色，八月至今，豬肉加工商雨潤（01068）升8%、百貨股金鷹（03308）升6.9%，時裝零售商德永佳（00321）升2.8%、中國食品（00506）升2%，表現比恒指或者大部分二三線股強勢得多。

從前集中OEM生產，到近年以「達芙妮」及「鞋櫃」兩個品牌經營零售的達芙妮（00210），近期宣傳攻勢唔錯，找來美資策略股東外，更開始見大行撰寫推介報告，剛剛出的中期業績，也相當見得人，難怪踏入○九年未夠三季，股價累積升幅已達2.1倍。

睇番達芙妮的中期業績，營業額及純利分別升11.5%及1.1%，以今年上半年內地零售愁雲慘霧的境況，大孖沙應該會相當滿意這份成績表，尤其如果不是上半年發出一批可換股票據（CB）要按市值計入一次過損失，實際盈利增長更有12%，算交足功課。

引入基金提升形象

以85億元市值及綜合市場預測純利5.29億元計，市盈率十六倍的達芙妮唔算超值，但對比時裝股如寶姿（00589）等，亦唔算貴。印象中，由以往永恩到今日的達芙妮，股價波動都相當大，○七年見過9.5元，今年初得番1.15元，較高位跌近八成八，最近公司學精咗，搵美國私募基金TPG入股兼入局（加入非執董），改變家族生意形象，引進新管理思維，尤其藉着新加盟管理層，在供應鏈管理方面下工夫。

此股各方面條件唔錯，股價在5元橫行已久，成交配合下，筆者相信中短線值得留意。而唯一美中不足，係TPG入股主要透過CB及股證，換句話，股價愈升，CB行使價與股價之間的損失，唔多唔少影響損益表，TPG要顯出誠意，最好仲係將CB全部兌換股份，唔好畀人有留定逃生門嘅感覺。