本文重點
內地八月份製造業數據中，通用設備製造業、通訊設備計算機及其他電子設備製造業嘅新定單指數，均高於整體製造行業平均水平，可見電子產業發展旺盛。
晶門科技（02878）主要從事集成電路晶片及提供系統解決方案業務，今年上半年銷售額2,666萬美元，同比下跌47%，淨虧損233萬美元。基本上，表現與行業一致，亦喺市場預期之內。
據晶門披露，上半年公司嘅定單出貨比率為1.07，預期下半年市場需求會有所改善。環顧整個行業，阿莊亦相信，晶門嘅業務已度過最壞時候，最重要係過去公司一直保持喺研發方面嘅實力，不斷開發更多新產品，推動多元化發展。
若然第三季嘅良好勢頭於末季延續，結合行之有效嘅削減成本開支計劃，全年業績或能「止血」，而明年更有望恢復盈利能力。
晶門尚有一個正面因素，乃由中央直接管理嘅國有骨幹企業——中國電子信息產業集團，自今年五月底首次披露持有晶門股權超過5%以來，多番入市增持，平均買入價介乎0.477至0.749元，最新持股量為20.02%。
央企入股引發憧憬
近月，喺官方傳媒報道CEC有份參與投資嘅「中國南京液晶谷」簽約儀式中，晶門被介紹為該集團擁有嘅「一批骨幹企業」之一。
從股權變化，可見晶門唔再係一間普普通通嘅IT公司，而係一家獲全國最大電子產業集團央企持股嘅IT公司。喺未來幾年國家致力推動嘅電子產業調整和振興規劃方案中，CEC可謂「任重道遠」，而未來晶門或可於當中擔當一定嘅角色。難怪近月晶門股價雖隨大市回落，但跌至0.7元水平現承接。反正大孖沙入貨價亦有數得計，若有閒錢，不妨小注跟進，放長線，話唔定真係可以釣到大魚。