滬、深二市昨日亦告反彈，可惜力度有限。究竟係抖氣之後再跌過，抑或已跌得差不多，呢一刻尚未可以下定論，特別係經歷過去年奧運前A股大散，喺今年「十．一」黃金周前，A股會否重蹈覆轍，呢份心理陰影揮之不去。

數據印證經濟復甦

雖然市況不振，但內地公布嘅經濟數據，繼續支持復甦之論。據講八月份中國製造業PMI總體呈現小幅上升至54%，符合市場期望。

事實上，自今年三月PMI回升至50%以上後，升到五、六、七月，指數變幅收窄，一直企穩在53%附近，八月份再現升勢，未嘗不是一個正面嘅訊號。若然未來一、兩個月，反映出口情況嘅新出口定單指數（八月份數字為52.1%）再展升勢，將可進一步確認製造業嘅復甦勢頭。

未知是否受到內地製造業數據消息提振，昨日造紙股有買盤追捧，理文造紙（02314）股價上升7.96%，收報13.56元；玖龍紙業（02689）升6.7%，報9.15元。

業績表現料有改善

玖紙將於本月十四日公布末期業績，翻查紀錄，公司截至去年底止半年純利同比下降69.4%，至約3.2億元人民幣。

不過，由於公司及時調整策略，將內銷比例大幅提升，配合次季內地經濟持續回暖，相信下半年經營表現可優於上半年。

提到玖紙，負債偏高依然係投資者關心嘅問題，查實大幅削減資本性開支，已是幾家大型紙商嘅普遍做法，玖紙亦不例外，相信這方面嘅效益將於未來兩個財年逐步顯現。

八月以來，玖紙股價未隨大市回落，反而錄得進帳，基本上已反映了大戶嘅取態。若果嚟緊年度業績對辦，相信可吸引更多長線基金重新下注。