時裝品牌搵明星做代言人係例牌動作，即將喺香港上市嘅內地男裝利郎，原本已經有內地重量級演員陳道明做代言人，但為咗提高品牌知名度，專程搵咗有型靚仔嘅吳彥祖做代言人，太子聽朋友講，吳彥祖喺下周二出席利郎投資者推介會，相信到時會引起哄動。
「簡約不簡單」係利郎產品嘅口號，話搵吳彥祖做代言人，一來係佢嘅形象配合公司主題，二來佢喺香港知名度高，所以決定搵佢拍一輯廣告。內地朋友講，利郎品牌喺內地多人認識都係多得佢哋嘅內地代言人——陳道明。
自從陳道明當上代言人後，利郎喺內地嘅知名度大大提升，帶動產品銷售，喺三年內，銷售翻咗十番。