本文重點
合和實業（00054）聯席董事總經理胡文新（Thomas）個銀包裏面，有好多「法寶」，尋日太子同佢食飯，發現佢銀包內有張畫有「好日」同「唔好日」嘅年曆卡，紅色格仔括住嘅日子就係「好日」，灰色格仔嘅就係「唔好日」，佢笑言係同事專登睇通勝整出嚟，方便揀日子公布業績。
唔怪之得合和上星期三公布中期業績嗰日咁「旺」，撞正金管局總裁任志剛離職前最後一次見傳媒，又有30幾家公司同日公布業績，原來嗰日係「好日」。
揀「好日」派成績
Thomas話好多上市公司都會揀「好日」公布業績，但依家要就埋收緊咗嘅董事禁售期，個個要加快公布業績，搞到可選擇嘅日子唔多。
喺忙之餘，Thomas都仍然好熱心推廣佢嘅冰球活動，佢同太子講佢哋個冰球會搞嘅國際業餘冰球賽，會喺本月底舉行。