踏入九月首個交易日，港股昨終於結束跌勢，但反彈力不足，未能突破20,000點關，恒生指數收報19,872點，升148點。恒基地產（00012）主席李兆基（四叔）接受本報查詢時認為，港股若跌至18,000點將「好抵買」。他稱，自己早前在21,000點時開始減持，證明眼光夠準。
21000點走貨眼光準
四叔說：「上次喺恒指21,000點賣咗嘅貨，都賺咗啲。跟住大市跌落19,000點，證明都睇得啱。之後買入澳元，帳面都有得賺。都啱啦，睇得都啱！為咗收息，依家唔會放澳元住。」
對於後市看法，四叔說：「嚟緊大市會平多少，到時唔怕買啲貨，將以前賣出嘅買番少少貨。照自己睇，如果平到18,000點已好抵買。」至於會買甚麼貨？四叔就稱遲些再算。而大市會否跌到萬八點，他則說：「個市仲會再跌多少少，但未必會跌到18,000點。」
恒指彈148 ADR瀉400
港股昨日反彈148點，但成交只有550億元，淡友尾市再度「空襲」期指，即月期指轉炒大低水218點，收報19,654點，微升31點。國企指數收市彈11,342點，升64點。
BMI基金管理總裁沈慶洪稱，42隻藍籌，已有18隻跌穿50日平均線。
滙控（00005）ADR報81.15元，較港收市價低2.2元，倫敦更低見80元；中移（00941）報75.52元，低0.63元。以此計算，恒指ADR早段瀉400點。