心水清嘅朋友，可能即刻諗到佢位太太邵蓓蘭係證券專業學會主席，所以狄勤思以行動支持吓該會嘅活動都好應該。

今次研討會嘅主題係上市政策最新發展，太子真係要洗耳恭聽。

出席證券專業學會研討

事關近期係有好多涉及上市政策嘅發展，諮詢文件亦推出咗唔少，好似縮短供股時間表、簡化上市程序、認可內地財務報表等。遲啲仲會推出檢討礦務公司上市要求、簡化關連交易等諮詢文件，仲未計市場矚目嘅季度業績諮詢、上市規則法定化等棘手項目，真係多到令人眼花繚亂。

依家政府最重視港交所三項發展，包括海外公司來港上市、簡化上市程序，同上市規則法定化，單單都同上市科有關。

狄勤思喺未來嘅擔子都好重。