本文重點
八月下旬港股沉悶非常，阿莊相信，待各位基金大戶抖暑完畢，九月份股海將會有「好戲上演」，第三季結算，指數若非升至近年新高，便頗大機會下試季內低點，但會唔會先高後低，牛、熊通殺，就要等做事後孔明！
上周五手持嘅平保（02318）除淨，揸1萬股收息1,700元，阿莊亦一如計劃，除淨過後，沽出5,000股平保（平均價60.6元），套現約30萬元，睇位換入中航科工（02357）。
大家都驚內地宏調，貴金屬、資源、內房等股份明顯缺乏承接，投資者惟有將目光轉移至具產業政策支持嘅股份，例如內需股、醫藥股，以增勝算。講起醫藥股，中國製藥（01093）將於九月八日公布中期業績，此前不妨多留意其盤路。
同行表現對辦
睇番同行表現，早前內地A股東北藥業（000597）公布今年上半年業績，淨利潤同比增長1.26倍，表現十分理想。由於東北藥業主營原料藥及製劑藥品，與中國製藥喺原料藥行業屬直接競爭對手，見到東北藥業上半年原料藥銷售增長逾五成，估計中國製藥相關業務表現亦唔會差得去邊。
翻查資料，今年首季，中國製藥實現純利為2.61億元，同比增長72%；而去年上半年嘅純利為4.43億元。若然今年次季業務保持首季嘅水平，估計即將公布嘅中期業績，純利可再現雙位數字增長。
展望下半年，雖然原料藥行業，特別係維生素C嘅產能將會增加，惟首四大生產商齊心，加上第三季廠商多半進行停產檢修，相信產品價格可以維持穩定，故展望全年，維生素C業務將延續去年嘅上升周期。
除了原料藥業務穩增外，中國製藥嘅成藥業務亦步入收成期，而受惠內地加快推動醫改，未來成藥業務大有可為，且有助降低公司業績受原料藥周期波動嘅影響。以其現價預測市盈率僅單位數字，若中期業績未有令人失望，股價應有力再試衝4.5至5元阻力區，50日線支持在4.1元。