上星期埋單計數，恒指跌101點或者0.5%，收報20,098點，A股有喘定迹象，國企指數跌幅更輕微，全周跌31點或者0.27%，收報11,433點。睇番恒指十天歷史波幅（HVG）由八月初高位接近40，跌到19.9，意味市場引伸波幅同樣在快速收縮中。

在沉悶的市況下，無論睇好睇淡，買窩輪都無可避免面對時間溢價縮水加速的問題，面對咁嘅形勢，史提芬認為倒不如等大市再回多500至700點，在19,500點附近買入心水股長揸好過。

建滔積層板（01888）以生產電子消費產品幾乎必需的原件覆銅面板及印刷線路板為主，在內地市場佔有率高達三成，內地對電子消費產品需求極大，行業前景毋庸置疑，至於股價長跌長有，毫無疑問，同招股定價過分進取有關。

筆者一直搵機會推介建滔板，尋日高盛帶頭唱好，相信會吸引更多芬佬捧場。事實上，現價○七年市盈率八至九倍，再跌的水位唔多，市況陰晴不定，這類質優價廉工業股，應係買得安心之選。

近年，歐美企業將生產外判，覆銅面板及印刷線路板在亞洲區需求與日俱增。擁有全球14%市場份額的行內一哥建滔板，中期業績正好顯示環球經濟復甦下，電子消費市場也逐漸脫離谷底。

盈利能力全面恢復

集團上半年賺8.18億元，比去年同期倒退11.8%，但與○八年下半年金融海嘯最恐怖的日子比較，當時賺2.75億元，大幅反彈接近兩倍，與○七至○八年上半年比較，賺錢能力已及得上高峰期八成八至九成，這份業績應該令捧場客感到滿意。

查實中期業績中，建滔板銷售額慘跌25%，但最終出來盈利僅跌11.8%，要多得毛利改善，毛利率從25.7%升至28%，這要歸功於原材料尤其銅價回落，另外低息期也有幫助，融資成本大幅減少67%，省下超過4,000萬元利息所致。

但展望下半年，情況應更樂觀，由管理層透露第三季定單又比第二季有所上升，電子產品市場需求回升，而且來自內地廠家的定單並無受海嘯影響，上半年佔銷售額39%，抵銷出口放緩的影響。

電子消費品市場復甦，微軟新視窗軟件快將上市，台灣的電腦代工及印刷線路板公司股份，早已炒得火熱，本來香港有同樣概念的公司唔少，像達進精電（00515）、大昌微綫（00567）和美維（03313），可惜唔係成交太少，就係規模唔大，少有基金留意，建滔板是各項條件較佳之選，估值唔高兼中期業績對辦，短期股價有機會更上一層樓。