本文重點
近期證監會執法工作有不少成績，首次就收市競價時段作出行動，又對付不少知名人士，好似凍結國美（00493）前主席黃光裕資產等等，行政總裁韋奕禮日前接受《亞洲華爾街日報》訪問時，亦不忘大讚法規執行部執行董事施衛民，話佢好似「鐵人」咁唔識疲倦（tireless），令證監會執法工作發揮不少效力。
施衛民被讚夠進取
韋奕禮話，自從施衛民由澳洲來港上任後，證監會執法工作嘅方向更加進取同創新，佢亦有勇氣挑戰約定俗成嘅觀念。
咁又係，證監會近年的確肯嘗試採用以往較少用嘅權力，好似凍結涉嫌違規人士嘅資產、亦以刑事檢控內幕交易等等。
韋奕禮為過去一段日子，證監會挑戰唔少大人物感到驕傲。好似電盈（00008）拆票事件、凍結黃光裕資產、調查中信泰富（00267）、同檢控大摩前要員杜軍內幕交易等。
韋奕禮又話外國人出任證監會有好處，因為佢哋可以從另類角度看事物，及有新思維。太子就話，佢哋可以同本地複雜嘅商業同政治環境保持一定距離，可能真係佢哋嘅優勢。