針對產能過剩嘅問題，據知日前國務院常務會議決定，向產能過剩和重複建設問題突出嘅產業作出治理。市場估計，被針對嘅產業包括鋼鐵及水泥業，而風電及多晶硅等新能源行業，亦可能係被治理嘅對象。

阿莊認為，吸收過去喺發展不同產業嘅經驗，內地及早出手治理個別投資過熱嘅重點行業，實在有其必要。對於現成嘅大企業，提高入行門檻，加強對新供應嘅管理，長遠而言有利冇害。

回說本港，有發展商將旗下全線樓盤加價推售，睇嚟喺本地住宅新供應有限之下，發展商都好惜貨，寧願抬高價慢慢賣。事實上，雖然未來利息趨勢向上，但以目前經濟狀況，憧憬利息急劇上升顯然係不切實際。至少未來一年，利息維持低企，加上新貨供應有限，對投資者而言，揸物業回報勝於銀行存款，亦可對抗通脹。

中期業績表現突出

個股方面，體育用品股李寧（02331）最近宣布中期業績，收入同比增長32%至40.52億元（人民幣．下同），而純利亦增長41.6%，至4.73億元，中期息每股13.58分。期內李寧嘅銷售成本上升34%至21.15億元，與銷售額增長一致；核心嘅李寧牌業務經營溢利持續增長，而新收購的紅雙喜牌亦實現經營溢利逾4,000萬元。

值得留意，期內李寧嘅EBITDA（息稅前利潤加折舊及攤銷）增長56%至7.73億元，而毛利率則大致持平喺47.8%水平，相比起期間內地整體經濟及同業競爭情況，李寧嘅經營表現充分體現競爭優勢。

此外，期內李寧嘅經營業務現金流入7.23億元，截至六月底止現金及等值淨增加2.53億元，財務狀況穩健，而開設新店嘅步伐亦符合預期目標。

除了盈利增長外，公司增派股息，亦為另一亮點，故見大行反應正面。今年底山東舉行第十一屆全國運動會、香港舉行東亞運動會，明年廣州舉行亞運會，預計內地體育用品行業可保持快速增長，李寧仍然係首選股份。

順帶一提，阿莊組合持有嘅平保（02318），派發中期息每股0.15元人民幣，將於今日除淨，阿莊打算喺收息過後，沽出5,000股平保，換入100,000股中航科工（02357）。