內地股市因為溫總言論，尋日一度急挫近4%，港股亦被拖累，恒指最多跌超過400點。好彩深滬股市尾市跌幅收窄，港股亦跌少好多，最終恒指收報20,435點，跌100點。
志強所持兩股唔係太受大市影響，國美（00493）仍處於收集期，在2.2元附近整固，反正長線，繼續持有。至於日前買入的京信通信（02342），業績前股價企硬，下周佳績可期，一於等埋業績先食胡。
香港資源（02882）尋日又異動，逆市升5.8%，不過成交得700幾萬股，又唔算好活躍。其實志強一直有留意此股，自當日獲白武士入股，又引入多個名牌策略投資者後，一直部署擴展動作。第一炮係買入早前一樣陷入財困、前身為恒豐金的金至尊（00870）。
聽聞香港資源已計劃聯同金至尊打造一站式黃金銷售業務，好似仲會夾埋銀行發行四條九足金金條。不過，香港資源之前幾次有消息公布，但股價卻未能進一步突破1.8元，志強都係睇定啲，等成交配合走勢突破，再決定跟唔跟搭順風車。