早前筆者曾分別將藍籌與國企的市帳率及市盈率，跟歷史水平相比，以市帳率計，港股現時約為二倍，處於歷史平均水平附近，但論到往績市盈率卻高達二十一倍，是九七及二千年科網熱以來最高水平。市場習慣以二十倍作為港股牛市警戒線，原因是每次都企唔耐，股市就會出現急挫。不過，投資股票屬於前瞻性活動，唔係讀歷史，展望經濟已經去到黑暗盡頭，甚至已經見到黎明，未來兩年股市市盈率會因為盈利上升而回落，由「偏高」重返「合理」水平。再者，市帳率遠低於歷史高位的3.5倍，也正好說明股市仲未去到過熱程度。

業績表現合乎預期

當然，由三月份低位至今，唔少股票升幅相當驚人，除非中期業績遠遠超越分析員估計，否則總會有趁好消息出貨的情況，東風汽車（00489）是尋日的最佳例子，半年純利26.06億元（人民幣．下同）創歷史新高，其實已符合市場預測的24億至27億元水平，但可能是因為比去年同期升幅只得5.4%，比起股價年初至今的2.44倍升幅，仍然令唔少捧場客失望，結果業績見光死，股價跌超過5%。

中央為扶持汽車工業，今年先後降低車稅，兼補貼汽車舊換新以刺激銷售，傾斜政策對乘用車輛相對有利。最近東汽宣布投資50億元興建日產合營廠房，使合營年產能力升至70萬架，增加固定投資，顯示管理層對汽車業後市信心十足；睇番大行預測數字，估計東風○九及一○年純利45.1億及50.9億元，相當於11.6%及12.9%年增長，預期市盈率14.5倍，或許水平高於歷史市盈率12.8倍，而1.25倍的PEG（市盈增長率）也高於一倍的市場共識抵買水平，可能今年的升勢確實有點過火，但唔代表東汽質素不值得受重視，若重返7至8元水平，將是另一次中長線入市時機。