跌市利淡言論迭至，有「新末日博士」之稱嘅魯比尼預言，當前經濟危機出現「二次衰退」或W形衰退嘅可能性正在上升。另外，內地知名經濟學家謝國忠則預期，A股泡沫可能喺下季爆破。

放大圖片	放大圖片	放大圖片

阿莊手持嘅旺旺（00151）公布中期業績，純利1.2億美元，同比下降6.4%，主要係受銷貨及分銷成本增加所影響，而類似去年同期嘅特殊收益亦有所減少，若撇除相關因素，調整後盈利增長約為13%。展望下半年，公司將致力完善供應鏈體系及提升生產效益，並積極推動「送旺下鄉」專案，加快新產品投放市場嘅速度。

雖然中期業績未有驚喜，但見其毛利率穩中有升，為38.6%，隨着高價原材料庫存陸續消耗完畢，下半年毛利率有改善空間，配合銷售額穩增，全年度業績展望並不悲觀，而相對於同類股，現價估值亦非十分昂貴，故一動不如一靜，繼續持有。

提及業績，中航科工（02357）最近亦公布成績表，今年上半年持續經營業務收入同比增長11.7%，至78.84億元（人民幣．下同），持續經營業務淨利潤679萬元，同比轉虧為盈，可見過去積極重組業務收效，如今終於成功「止血」，標誌着公司走上盈利增長嘅新里程。

重組見效前景光明

內地要快速推動航空產業發展嘅戰略毋庸置疑，低空空域將逐步開放，加上政府嘅刺激經濟措施，將加快民航機場建設，並不斷完善直升機通用航空服務嘅基礎建設，故可以說，中航科工嘅業務發展已走啱方向。

市場引述中航科工母公司管理層表示，母公司目標是用三至五年時間，將旗下八成主要業務上市，而主要航空資產將注入中航科工，規模以千億元計云云。究竟未來注資嘅步伐如何，還需要視乎市況及母公司嘅規劃進度，但一點可以肯定，中航科工要做大航空業務嘅方向已十分明確。

阿莊仲好記得，中航科工喺沙士年上市，唔少投資者都睇好，可惜其後三年股價一直低迷，近三個財政年度持續錄得虧損，直至近年同系公司啟動重組，股價才現生氣。

睇見呢份中期業績，直覺呢隻股經已走出低潮，一家重拾盈利能力嘅企業，值得予以另眼相看。再講，既然母公司擺明要向其注資，公司發展方向明確，情況與年初阿莊推介嘅中油香港（00135）類似，結論都係：如此「大翻身股」難求，別錯失良機！