陸續有大行估計，未來內地將會作出加息行動，其中德銀估計最快喺今個秋季實現，而高盛則預計明年內地將加息三次。

放大圖片	放大圖片	放大圖片

事實上，不單止係內地，目前全球利率低迷，若然經濟確認回穩復甦，加息係大勢所趨，這亦意味着全球貨幣政策將結束極度寬鬆嘅日子。

個股方面，阿莊最喜歡嘅中資電力股華潤電力（00836），上半年純利22.68億元，同比增長1.25倍，中期息每股6仙。呢隻電力股根基紮實，經營得法，加上拓展新能源進度理想，業績和股價表現應可繼續跑贏同類股。

中國南車業務復甦

此外，阿莊手持嘅中國南車（01766）公布，中期純利同比倒退22%，至6.26億元（人民幣．下同），對此阿莊並不感意外。反而見到公司次季增長動力回升，相信已確認業務復甦勢頭，加強阿莊嘅持貨信心，故昨日按平均價每股4.53元，入場增持了10萬股。

暑假將完，下一旅遊高峰期係「十．一」黃金周，聽聞計埋中秋假期，今年內地黃金周將長達八天。若然中央真係有心想國民放長假多消費救救經濟，則長假前股市無道理會大散，否則國民仲邊有心情消費呢？總括而言，八月嘅調整市，又係咪為咗九月升勢打好基礎？

講到「十．一」黃金周，又可以睇睇隻錦江酒店（02006）。錦江旗下嘅A股上市公司錦江股份（600754），今年上半年盈利同比增長12%，至1.84億元，次季表現有所改善。錦江股份正商議進行重大資產重組，目前尚在停牌中。如無意外，相信重組方案會喺未來兩周明朗化。

據講，今次錦江酒店會將旗下「錦江之星」業務及資產注入錦江股份，以釐清兩者嘅業務分工，具體係日後錦江酒店專注投資星級酒店，而錦江股份則專做酒店管理。當然，具體重組計劃仍有待正式公布，惟一旦落實，相信會係一份「雙贏」嘅方案。

近有「十．一」黃金周，遠有明年世博等好消息跟尾，加上資產重組效應，相信未來錦江酒店嘅業務發展可步入坦途。再看其股價走勢，上月下旬已異動，股價由1.6港元（下同）升穿2元關，本月上旬重組消息曝光，股價一度抽上2.66元，之後隨大市調整，但2元關現承接，昨日收市報2.24元。若後抽成功，相信可越2.6至2.7元水平，穿1.9元止蝕。