在上周五晚美股做好帶動下，恒指尋日高姿態裂口高開，仲終於成功升穿近期阻力位20,500點添，可惜高位見壓力，最終全日只係升336點，收報20,535點，成交金額622億元。
尋日市場焦點繼續落在業績股身上，當中華潤電力（00836）中期純利急升逾倍，認真犀利，股價亦升5.5%。相反，中國財險（02328）中期盈利3.2億元人民幣，遠差過市場預期，股價逆市跌1.3%收市。
今日就輪到中國人壽（02628）公布中期業績，早排佢嘅股價跟隨大市調整，但跌至32元見支持反彈，尋日更成功收復10日線水平。
雖然「三保」其餘兩保－平保（02318）同財險業績都欠理想，但今年上半年A股表現始終強勁，對國壽的投資收益大有裨益，加上集團自去年以來致力改善業務結構，配合內地經濟好轉，國壽相對同業應可睇高一線，今日業績或有意外驚喜，何況佢仲有入股農行嘅傳聞，亦加添了賣點。